بين الجحّة والخصوصية

• 

صباح الخير

أول كتابة لي في مدونتي.

الصدق إني كنت محتارة أكتب في إيش بالضبط:

أشياء تخص العمارة، دراستي وعملي، أو خبرتي في التصميم الداخلي والإشراف؟

أكتب عن أشياء مفيدة؟ ولا مواقف صارت لي؟

وأجلس أفكر وأفلتر: إيش اللي يصلح ينحكى وإيش اللي ما يصلح.

هل بتكون مدونة شخصية؟

أنا ما أحب الإنسان بشكل عام يكون مكشوف بزيادة.

خصوصًا أنا كانوا يسموني وأنا صغيرة «جحّة» و«دجاجة».

جحّة لأن أي شيء عندي أقوله، ما كنت أخبّي.

كنت أشوف كل الناس حليلين وحبيبين وبيدخلون الجنة لأنهم مسلمين، فما في أحد يضر إلا الكفار.

مرة كانت أفكاري وتصرفاتي في الطفولة والمراهقة مبنية على كذا.

شوي شوي بدت تتطور وتتفلتر، بس برضو أشوف الناس كلهم يحبون لي الخير ويحبون لبعض الخير.

بعدين صرت أشوف مواقف غريبة جدًا وصدمات على تصرفات الناس مع بعض.

أنا لسه في وضع المتفرج.

شوي شوي صرت أحترم الخصوصية وأفهمها مرة زين،

خصوصًا إن في ناس بدت تسمي أي شيء له علاقة بالخصوصية «جحادة».

كنت أتضايق، بعدين صرت أقول: بكيفهم، أهم شيء أنا مرتاحة.

لأنه جدًا مزعج حتى لما تشاركين الناس أمنياتك وخططك لنفسك،

وإذا ربي ما كتبها لسبب ما،

يحاسبونك كأن القرار بيدك.

ضغط نفسي مزعج مرة.

تحسبوني تبت؟

إلى الآن أشارك، بس أعتبر نفسي أحسن من أول بكثييير، بفلترة ممتازة.

لدرجة إني أصلًا ما أسأل حتى أقرب الناس لي عن أي شيء يخصهم،

عشان إذا أي أحد سألني وقلت «ما أدري» ما أعتبر جحود.

تعرفون تأنيب الضمير العميييق؟

الخطأ اللي ما أبي يُحتسب علي كذبة إذا قلت «ما أدري».

بس دايم أقول في نفسي:

إذا قلتي «ما أدري» حتى لو تدرين، ترى فيه درء لمشاكل وفرقة، وتجنّب نميمة.

إن شاء الله إنك مأجورة عليها بإذن الله.

أتمنى إني ما أقرأ هذا المحتوى بعد سنة وأنتقد نفسي على مستوى الشفافية في الكتابة.

نجي لـ «دجاجة»،

لأني كنت أنام بدري، والحمد لله ما زلت أنام بدري.

هذي الألقاب لو انحكت الحين لأي طفل تعتبر تنمّر عظيم.

أنا كنت أشوفها صفات مشتركة:

الجحّة واضحة،

والدجاجة تحترم الكون، تنام بدري وتصحى الفجرية.

فنشوف إيش بيطلع معنا وبنوصل لإيش.

فهذي المدونة قد تكون خليط من كل شيء يدخل تحت دائرة اهتماماتي بإذن الله.

وإن شاء الله تكون شاهدة لي لا علي،

وإن لا أؤذي فيها أحد،

ولعلها بإذن الله تكون سبب رزق لمن يشاء الله من عباده